Jam gjithmonë me ty. Prania Ime të rrethon, Unë shkoj përpara teje dhe nuk do të të lë kurrë, as nuk do të të braktis (Ligji i Përtërirë 31:8). Edhe në ato çaste kur ndihesh vetëm në këtë botë ose nuk e ndien praninë Time, Unë jam po aq pranë teje sa kam qenë gjithmonë dhe ti je po aq i shtrenjtë për Mua. Mund të m’i sjellësh gjithmonë të gjitha shqetësimet e tua në lutje dhe të gjesh prehjen që të kam premtuar për shpirtin tënd (Mateu 11:28–30).
Unë veproj në jetën tënde edhe përmes gjërave të vështira që përjeton, për të të ndihmuar të afrohesh më shumë me Mua dhe të kuptosh sa thellë ke nevojë për Mua. Nëse nuk do të përballeshe kurrë me sprova apo vështirësi, nuk do të forcoheshe në besim dhe nuk do të mësoje të më besosh Mua dhe premtimet e Mia për ty, që gjenden në Fjalën Time. Në kohët e vështira mëson të më kërkosh me gjithë zemër, dhe pikërisht aty do të më gjesh (Jeremia 29:13).
Mbaje mend se Unë jam gjithmonë me ty, deri në mbarim të botës (Mateu 28:20). Unë jam Bariu yt i mirë, Ai që qëndron me ty edhe në luginat më të errëta të jetës, të udhëheq dhe ta përtërin shpirtin tënd (Psalmi 23:1–4). Prandaj, m’i sill të gjitha shqetësimet e tua dhe më lejo t’i mbaj Unë meraket, dhimbjet e zemrës dhe barrët e tua, ndërsa ti gjen prehjen tënde tek Unë. Lejoje Fjalën Time të të japë paqen, shpresën dhe mençurinë që kërkon në çdo stinë të jetës. Tek Unë do të gjesh gjithçka që të nevojitet (Psalmi 23:1).