Pothuajse çdo ditë mahnitem nga ndonjë aspekt i mrekullueshëm i krijimit të Zotit. Sot ishte radha e bimës së ringjalljes, e quajtur kështu sepse, edhe pse duket sikur ka vdekur, në të vërtetë ajo thjesht fle, derisa të gjejë ujë dhe të shpërthejë sërish në jetë. Këto bimë rriten në kushte të thata, pothuajse shkretëtirë, dhe mund të mbijetojnë me vite të tëra pa ujë.

Bimët e ringjalljes mund të humbasin deri në 95 për qind të ujit qelizor dhe prapë të mbijetojnë. Mund të kalojnë vite pa gjetur ujë, por sapo e gjejnë, mrekullia fillon. Brenda vetëm pak orësh ato hapen dhe gjelbërojnë përsëri.

Disa familje të krishtera i trashëgojnë bimët e ringjalljes nga një brez te tjetri, si një kujtesë e ringjalljes së Jezusit. Kjo bimë e bukur shpesh vendoset në një tas me ujë gjatë Krishtlindjes dhe Pashkës. Ajo është një kujtesë e fuqishme e cikleve të jetës dhe vdekjes, si edhe e premtimit për fillime të reja dhe ripërtëritje që vijnë me besimin në Zotin.

Bima e ringjalljes na tregon gjithashtu se edhe kur kalojmë periudha të thata në jetë, ekziston shpresa për ripërtëritje. Shkëndija e jetës qiellore mbetet brenda nesh, pavarësisht nga pamja e jashtme. Ne kemi nevojë të përshtatemi në kohë të vështira dhe të tregojmë qëndrueshmëri. Këto bimë na kujtojnë edhe se ndonjëherë duhet kohë për të gjetur zgjidhje për problemet tona, për t’u ushqyer nga Jezusi, uji i jetës, në një tokë të thatë e me pluhur. Mund të dukemi të fjetur gjatë fazave të qeta të jetës sonë, por kur vjen koha e duhur, duhet ta lejojmë Jezusin të na udhëheqë drejt strehës sonë të dëshiruar, ku mund të lulëzojmë dhe të çelim.

Më vjen ndër mend ajo që Zoti i tha Jeremias: “I bekuar është ai që ka besim te Zoti dhe që e ka shpresën tek Ai. Ai do të jetë si një pemë e mbjellë pranë ujit, që i shtrin rrënjët drejt përroit. Nuk frikësohet kur vjen vapa; gjethet e tij mbeten gjithnjë të gjelbra. Në vit thatësire nuk shqetësohet dhe nuk pushon së dhëni fryt” (Jeremia 17:7–8).

Pashka është një kohë për të medituar mbi këtë shndërrim, nga vdekja e së vjetrës në jetë të re. Është një kohë për të festuar faktin se Jezusi dha jetën e Tij për ne, që ne, përmes sakrificës së Tij, të kemi jetën e përjetshme.