Dashuria është një nga fjalët e para që mësojmë si fëmijë, së bashku me “mami”, “babi” dhe shumë fjalë të tjera që na flasin për përkujdesje e ngrohtësi. Jam e bindur se për dashurinë janë shkruar më shumë këngë sesa për çdo temë tjetër. Por çfarë është, në të vërtetë, dashuria? Bibla na thotë: “Zoti është dashuri” (1 Gjoni 4:8).

Kur isha 19 vjeç, fillova të lexoja Biblën dhe më kujtohet se një varg më preku veçanërisht: “E vetmja gjë që ka vlerë është besimi që vepron nëpërmjet dashurisë” (Galatasit 5:6). Të gjithë gabojmë, por kemi nevojë për besim dhe durim, pa lejuar që gabimet e të tjerëve të na pengojnë t’i duam.

Si bashkëshorte, nënë dhe bashkëpunëtore, më është dashur të mësoj t’i fal të tjerët për të këqijat që më kanë bërë, madje edhe kur dyshoja se disa veprime ishin bërë me qëllim. Kjo më ka ndihmuar ta kuptoj më mirë zemrën e Zotit, i cili është shembulli i përsosur i faljes dhe shprehja më e lartë e dashurisë. Ai e dinte se askush prej nesh nuk mund të ishte i drejtë me forcat e veta, prandaj dha Birin e Tij të vetëm për shpëtimin tonë.

Kam mësuar gjithashtu se lutja është një shprehje e dashurisë. Kur ndieja se nuk mund ta falja dikë, zbulova se ishte e pamundur të mbaja mëri ndaj atij personi ndërsa lutesha për të. Prandaj lutesha për të dhe i besoja Zotit që të më jepte hirin për ta falur.

Edhe pse dashuria jonë njerëzore është e kufizuar dhe shpeshherë dështon, kam përjetuar se Zoti mund të më ndihmojë të dua edhe dikë që më vë në provë durimin. “Çdo dhuratë e mirë dhe çdo dhuratë e përsosur vjen nga lart, zbret nga Ati” (Jakobi 1:17).

Dashuria është veprim, besim, falje dhe lutje. Ajo është gjithashtu mirësi, mirëkuptim, përkujdesje, durim dhe shumë virtyte të tjera të mrekullueshme. Jezusi na mësoi ta duam të afërmin tonë si veten, dhe na tregoi se i afërmi ynë është kushdo që ka nevojë për ndihmën tonë, pa marrë parasysh besimin, ngjyrën e lëkurës, kombësinë apo pozitën shoqërore.

Nëse ende nuk e ke pranuar Jezusin si Shpëtimtarin tënd, mund ta bësh këtë duke u lutur me këtë lutje:

I dashur Jezus, besoj se Ti je Biri i Zotit dhe se vdiqe në kryq për mua, që përmes vdekjes dhe ringjalljes Tënde të kem jetën e përjetshme me Ty në qiell. Të lutem, më fal mëkatet e mia. Ta hap derën e zemrës sime. Të lutem, më mbush me Frymën Tënde të Shenjtë dhe më ndihmo të jetoj në një mënyrë që të të sjellë lavdi Ty. Udhëhiqe jetën time dhe më ndihmo të të ndjek besnikërisht. Në emrin Tënd lutem. Amen.