Të bësh ndryshime të rëndësishme në ritmet, zakonet dhe mënyrën si ke mësuar t’i bësh gjërat prej kohësh mund të jetë sfiduese. Por kur kupton se disa modele sjelljeje po të pengojnë të ecësh përpara dhe të japësh fryt, atëherë vjen koha të mendosh për një rregullim. Ka një kohë kur duhet të lëshosh disa gjëra në jetë (Eklisiasti 3,6), në mënyrë që të lësh pas të shkuarën dhe të shtrihesh drejt synimit që të pret përpara (Filipianët 3,13).
Të dalësh nga brazdat e zakonshme dhe të hapesh ndaj sfidave të reja nuk është e lehtë, por synimi i rritjes shpirtërore ia vlen dhe do të sjellë fryte të mira në jetën tënde. Mbaje mend gjithmonë se kur të vijë momenti për të ndryshuar drejtim, Unë do të të udhëheq në shtegun më të mirë për jetën tënde, do të të këshilloj dhe do të mbaj syrin mbi ty (Psalmi 32,8). Unë do të eci para teje dhe do të jem me ty në çdo hap të udhës (Ligji i Përtërirë 31,8).
Prandaj mos mendo kurrë se kapërcimi i rutinave apo zakoneve që të mbajnë mbrapa nuk ia vlen mundimin. Ia vlen çdo përpjekje, çdo lot dhe çdo vështirësi. Do të të shtyjë përpara dhe do të të ndihmojë të dalësh nga zona jote e rehatisë, duke kërkuar një rrugë më të mirë — një sfidë të re në jetë. Sa herë që të udhëheq në një drejtim të ri, kjo do të sjellë fryte të mira dhe do të punojë për të përmbushur planin dhe qëllimin Tim për jetën tënde.
