A jeni pyetur ndonjëherë si ka mundur krishterimi të përhapet nga një krahinë e vogël si Juda në brigjet e Mesdheut, për të arritur pothuajse në çdo cep të botës deri në shekullin XXI? A jeni mahnitur ndonjëherë kur keni dëgjuar se si krishterimi jo vetëm që mbijetoi, por edhe lulëzoi nën diktatura të ashpra dhe regjime totalitare? Apo keni menduar se si brez pas brezi, prindërit ia kanë transmetuar me sukses besimin e tyre fëmijëve, edhe në vende ku besimtarët janë pakicë brenda kulturës më të gjerë? Dhe a ju ka shkuar ndonjëherë në mendje se si njerëz të cilësuar si kriminelë të pandreqshëm kanë gjetur besimin edhe teksa ndodheshin prapa hekurave të burgut?
E pabesueshme, por e vërtetë: besimi në Krishtin përhapet më fuqishëm nëpërmjet dëshmisë personale—kur individë ndajnë ungjillin me të tjerët. Që nga ndjekësit e parë të Jezusit që ecën rrugëve të Judesë, deri tek unë e ti sot, plani i Zotit ka qenë gjithmonë i njëjtë: përhapja e lajmit të mirë. Jezusi tha: “Ashtu siç më ka dërguar Ati, edhe unë po ju dërgoj juve” (Gjoni 20:21).
I ndjeri pastor Billy Graham, i cili udhëhoqi miliona njerëz drejt besimit në Krishtin përmes takimeve të mëdha ungjillizuese, e kuptonte thellësisht rëndësinë e kontaktit personal. Pas çdo eventi, grupe të vogla besimtarësh qëndronin aty për të takuar individualisht ata që kishin pranuar Jezusin, me qëllim që t’i udhëzonin dhe t’i mbështesnin në hapat e parë të besimit të tyre.
Numri i këtij muaji i Activated sjell dëshmi, këshilla, strategji dhe inkurajim për të na ndihmuar në atë që shpesh quhet “Urdhri i Madh,” sfida që Jezusi u dha ndjekësve të Tij: “Shkoni në gjithë botën dhe predikoni ungjillin çdo krijese” (Marku 16:15).
Philip Kotler, i njohur si “babai i marketingut modern,” ka thënë dikur: “Reklama më e mirë bëhet nga klientët e kënaqur.” Këta jemi ne—fushata e Zotit përmes dëshmisë sonë.