Dhjetori është një nga muajt më të angazhuar të vitit. Ditët janë të mbushura me organizime eventesh, lodra ricikluese për t’ia dhënë fëmijëve në nevojë, dhurata të sapo blera, dekorime shtëpish dhe plane për t’u mbledhur mbrëmjen e Krishtlindjes, si dhe darkën e Pragut të Krishtlindjes. Më pas, vijnë festimet e Vitit të Ri për të përzënë vitin e vjetër dhe për të pritur vitin e ri.
Por ka edhe disa ditë të veçanta, si një ishull refugjatësh që pluskon me qetësi në këtë det lëvizjeje të përjetshme, ditët mes Krishtlindjes në kalendarin Gregorian dhe Vitit të Ri, nga data 26 deri në 30 dhjetor. Këto ditë janë koha ime personale e reflektimit. Jo se unë kam pesë ditë tërheqjeje shpirtërore, pasi ka ende shumë gjëra për të bërë për të mbyllur vitin! Por gjatë këtyre ditëve është koha kur unë mbledh ngjarjet e vitit që po mbaron dhe meditoj për vitin që vjen.
Së pari, nxjerr agjendën time për të kujtuar ngjarjet më të rëndësishme të vitit. Falënderoj Zotin për bekimet e dukshme, si dhe “bekimet e maskuara” që vinin në formën e vështirësive dhe mësimeve të nxëna gjatë rrugës! Jam mrekulluar gjithmonë duke parë sa shumë gjëra mund të ndodhin për 12 muaj, të cilat duken sikur kanë ndodhur shumë kohë më parë!
Po të mos merrja kohën e nevojshme për të parë pas, disa nga fijet e rëndësishme të tapicerisë sime do të humbnin në harresë dhe unë mund të humbas panoramën e madhe të ngjarjeve që po shpalosen. Ndër vite kam krijuar një koleksion përmbledhjesh fundviti.
Pastaj, mezi pres vitin që po vjen. Disa vite duket se janë planifikuar me kohë tashmë, të tjerat janë më të mjegullta, por në çdo rast, e di që do të ketë gjithmonë surpriza. Unë ia kushtoj vitin Zotit dhe shkruaj një lutje teksa ndihem e udhëhequr. Përpiqem gjithashtu të gjej një varg të përshtatshëm biblik që do të shkojë së bashku me lutjen.
Këtë vit, vargu im është Mateu 6:33 nga Predikimi në Mal. Jezusi tha:, “Por para së gjithash kërkoni mbretërinë e Perëndisë dhe drejtësinë e tij dhe të gjitha këto gjëra do t’ju shtohen.” Shpresoj ta rishikoj shpesh dhe të studioj se çfarë do të thotë “para së gjithash të kërkoj mbretërinë e Perëndisë” në veprimet e mia. Do të më pëlqente gjithashtu të mendoj se çfarë do të thotë “drejtësi” për Të, për të cilën dyshoj se ka më shumë lidhje me dashurinë, besimin dhe hirin, sesa përpjekjet e mia të ndershme drejt përsosmërisë. Dhe së fundi, të kem besim për “të gjitha këto gjëra” që Ati im qiellor premton të sigurojë.
Çdo vit pres me padurim këto ditë midis Krishtlindjes dhe Vitit të Ri, kur mund të lë mënjanë kohë të tërhiqem nga aktivitetet e dhjetorit, të bëj përmbledhjen e vitit të kaluar, të numëroj bekimet e mia të shumta dhe të filloj vitin e ardhshëm në kujdesin e Tij të çmuar.